Lou Cèntre Internaciounau de l’Escrit en lengo d’Oc

Crea en 1994, emé l’ajudo de l’Université d’Aix-Marseille e lou Labouratòri dirigi pèr Jean Véronis, lou CIEL d’Oc fuguè un di proumié site à metre en ligno d’oubrage introuvable vo abena, belèu meme avans la BNF Gallica. Après 25 annado, lou noumbre de counsulto a fa que crèisse, d’en proumié que de mai de mai de gènt se soun mes à l’ourdinatour, pièi, de bouco en auriho, lou site fuguè couneigu pèr lis estudiant, lis ensignant, de famiho qu’an descubert qu’un membre de sa famiho a escrich en prouvençau, e tout simplamen de legèire en cerco d’oubrage ancian rare e de la croumpo carivèndo.

Lou “CIEL d’Oc” es la centralisacioun pèr la memourisacioun enfourmatico de tóuti li doucumen escrich en lengo d’Oc, doucumen esparpaia dins li biblioutèco e li museon, public o priva, de Prouvènço, d’Éuropo e dóu mounde entié. Milo an de literaturo e d’escrit dins nosto lengo podon aro trouba uno assousto enfourmatico en Prouvènço.

Perqué ?

Milo an d’ecrit en lengo d’oc pèr 32 departamen dóu Miejour de la Franço, uno regioun italiano dis àuti valèio piemounteso e un estat soubeiran, lou Vau d’Aran, es bèn un di mai impourtant patrimòni lenguistique e cultura d’Éuropo qu’es amenaça d’óublit. Preserva aqueste patrimòni devèn de mai en mai urgènt. Li doucumen e li publicacioun en lengo d’Oc, esparpaia dins lou grand noumbre de biblioutèco o museon moron plan planet sus soun vièi suport papié. Sa counsulto pèr un cercaire, un estudiant o un simple amourous de la lengo es toujour longo e dificilo, senoun impoussible pèr lis oubrage tras qu’ancian o dins de biblioutèco aluenchado.

De mai, la còpi sus microfilme di tèste en lengo d’Oc jamai fuguè uno priourita pèr li biblioutèco publico. Noumbrous demié li Counservatour couneissènt pas la lengo ignoron la valour dis escrit qu’an en reservo. Counservon, es tout !

Lou manco de voulounta dóu gouvèr de metre en valour li lengo regiounalo, met de coustat l’óupcioun au bacheleirat. Li poste d’ensignant soun supremi, li parènt e lis escoulàri preferisson se vira devers l’anglés.

Coume ?

Davans aquéli coustatacioun :

– d’uno man, risque de desparicioun dis escrit en lengo d’Oc toujour mal equipa, dins li biblioutèco

– de l’autro, dificulta d’acès à la counsulto d’aquéli doucumen, que souvènti fes, de revisto, mau counservado, fan partido di “ Revisto morto ”…

Semblavo priouritàri de sauvo-garda sus un nouvèu suport enfourmatique tóuti aquélis escrit e de li recampa en un soulet endré pèr li pourgi à la counsulto : pèr couneissioun sus lou maiun Internet.

 Au moumen que lou Counsèu de l’Éuropo se preóucupo dóu sort di culturo minouritàri de la Coumunauta, un chourmo coumpousado d’ensignant, de juristo, de proudutour multimedia, d’especialisto de la presso e de l’edicioun en lengo d’Oc, soustengu pèr la coumuno de Berro l’Estang, èro lèsto à s’engaja dins aquesto acioun de sauvetage.

Quétis amiro ?

– La sauvo-gardo de tout ço que s’es escri coume libre vo ate de touto meno, en lengo d’Oc.

– La memourisacioun enfourmatico de tóuti li doucumen esparpaia e sa centralisacioun en un soulet endré, acò pèr uno simplificacioun de l’acès i doucumen.

 La meso à dispousicioun d’uno doucumentacioun coumplèto sus l’escrit en lengo d’oc èro assouludamen necito : es la demoucratisacioun dóu dre à la culturo d’Oc.

Recoustitui uno biblioutèco sufisentamen drudo èro uno escoumesso e un gourg financié, se falié croumpa mai tóuti lis escrit en lengo d’Oc. Pèr chanço, li prougrès realisa en matèri enfourmatico an permés de ramplaça avantajousamen tóuti li suport papié. La coustitutioun d’uno biblioutèco enfourmatisado pòu permetre de realisa, sènso despensa trop de dardèno, lou mai grand Cèntre de doucumenacioun lenguistique.

Li Prouvençau, e lis autre, podon counsulta sus soun escran, au siéu, tóuti lis écrit en lengo d’Oc. Uno estamparello pòu meme restitui sus papié li tèste utile pèr si recerco e sis escoulan.

En un segound tèms, aro que la doucumenacioun memourisado es tras qu’impourtanto, lou Cèntre Internaciounau de l’Escrit en Lengo d’Oc es intra dins lou maiun “Internet” e lis àutris autorouto emé de liame emé d’àutri biblioutèco, e ansin la doucumentacioun en lengo d’oc devèn acessiblo à l’oustau pèr tóuti.

Ounte ?

Despièi sa creacioun, la vilo de Berro l’Estang a aculi lou Cèntre Internaciounau de l’Escrit en Lengo d’Oc. Dins lou cadre de la poulitico prouvençalo menado pèr la coumuno despièi proun d’annado, lou Cèntre devié èstre lou coumplemen d’un Museon d’Art e Tradicioun, mai lou projet a cabussa.

Aquest acuei a marca la voulounta de l’ancian Maire, Segne Sèrgi Andréoni, de soun sucessour Segne Mario Martinet, e soun Counsèu Municipau, de defèndre e promòurre la lengo e la culturo prouvençalo, en un liò d’endustrialisacioun avançado, ounte acò pòu sembla anacrounique e que pamens se vòu un di mai simboulique pèr l’aveni de la lengo d’Oc :

 Anen avans e veiren Berro…

 Dins aquesto eisourtacioun passo touto la voulounta d’un pople d’anan de l’avans, de lucha pèr sa preservacioun futuro e enfin d’apoundre l’amiro majo : l’estatut de lengo vertadieramen vivènto pèr nosto lengo.

Plan d’acioun :

– D’en proumié tèms, lou recampamen dis enfourmacioun fuguè facho, valènt-à-dire lou recensamen di founs de libre e doucumen en lengo d’oc dins li biblioutèco, pièi lis autourisacioun de duplica li tèste fuguèron demanda.

Aro d’autour countempouran nous baion sis oubrage que soun plus dispounible en librarié.

– Un catalogue eleitrounique di biblioutèco e de si libre en lengo d’oc fuguè fach e coumpleta à flour e à mesuro.

– Pièi, fuguè fa sus plaço de còpi di libre e manuscrit, pèr foutougrafìo numerico, bono-di d’emplegat dóu Cèntre.

– La còpi realisado, fuguè menado au Cèntre pèr èstre memourisado, relegido, courregido dins lis unita centralo dis l’ourdinatour, e tant lèu duplicado pèr ètre archivado sus un suport numerique. Aquéli sauvo-gardo podon counteni quàsi 300.000 pajo estampado van largamen facilita la manutencioun dis archiéu. La mai grando part de la culido di doucumen s’es facho au cours di proumiéris annado : li recerco pèr retrouba li manuscrit óublida fuguèron di mai dificilo, mai milo an d’escrit, acò meritavo bèn uno redescuberto e uno proumoucioun nouvello. Tout acò coustituo aro lis archiéu dóu Cèntre.

– Un Counsèu d’Amenistracioun e un Counsèu Scientifique an decidi di chausido e di priourita demié li doucumen à presenta vo à archiva. Un cop enregistrado dins la memòri de l’ourdinatour, lis enfourmacioun soun dispouniblo pèr tóuti meno d’aplicatioun. De liame ipertèste permeton de passa d’uno counsultacioun à uno autro, de seleiciouna, tria, coupa, pega de tros… pèr aquest biais, es poussible de realisa d’encicloupedìo eleitrounico, de lougiciéu de courreicioun ortougrafico, d’aplicacioun de traducioun autoumatico, etc.

– Un pau mai tard, aro que lis ourdinatour se soun un pau mai vulgarisa, que quasimen tóuti li fougau an soun escran, poudren faire de sequènci videò, crea dóutis que presentaran lis obro de nòstis escrivan, emé counferènci, animacioun e musico, qu’acoumpagnaran la leituro de si pouèmo, que nous baiaran de traducioun en tóuti meno de lengo estrangiero, etc…

Vaqui.

I’a encaro de pan sus la cledo, meme 25 an après sa creacioun. Sian plus au tèms quand Moussu Vital-Mareille disié : ” l’erreur capitale de certains régionalistes est d’avoir des rêves trop courts et des projets étriqués. Ils se contentent de conserver alors qu’il faut bâtir “.

Tóuti li bastissour saran toujour li benvengu pèr baia ajudo au CIEL d’Oc.

Cabiscolo, Patricia Dupuy

Pèr mai d’entre-signe :
Sèti souciau : C.I.E.L. d’Oc, 3, place Joffre, 13130 Berre-l’Etang
Burèu amenistratiéu : C.I.E.L. d’Oc, 12 Traverse Baude, 13010 Marseille